Coetiroedd Dyffryn Gwy - Golygfa Ban, ger Drefynwy

Teithiau cerdded drwy goetir gyda golygfeydd i gyfeiriad Bannau Brycheiniog

Beth sydd yma

Cŵn
Parcio (am ddim)
Llwybr cerdded

Diweddariad coronafeirws

Mae ein safleoedd a’r rhan helaeth o’n cyfleusterau i ymwelwyr ar agor ond, o dan y cyfyngiadau coronafeirws presennol yng Nghymru, bwriedir i’r rhain gael eu defnyddio gan bobl sy’n byw yn lleol yn unig.

Fe’ch cynghorir – yn unol â rheoliadau Llywodraeth Cymru – i beidio â gyrru i unrhyw un o’n safleoedd i wneud ymarfer corff, oni bai fod gennych reswm dilys, megis cyflwr iechyd neu broblemau symudedd.

Rydym wedi newid ychydig ar rai o’n llwybrau arferol er mwyn eich helpu i allu cadw at ymbellhau cymdeithasol - dilynwch arwyddion ar y safle.

Trosolwg

Golygfa Ban (Beacon View) yw'r man cychwyn ar gyfer dwy daith gerdded trwy goetir heddychlon Beacon Hill.

Mae'r ddwy daith yn arwain trwy ardaloedd o rostir sy’n ail-adfer. Cafodd y mannau agored hyn eu clirio o goed pinwydd er mwyn i'r grug ddychwelyd. Mae merlod pori yn helpu i gadw rhywogaethau ymosodol rhag meddiannu’r rhostir.

Mae gwylfannau ar hyd y ffordd lle gallwch fwynhau golygfeydd eang dros Ddyffryn Gwy.

Coetiroedd Dyffryn Gwy

Mae coetiroedd rhannau isaf Dyffryn Gwy yn rhai o'r harddaf ym Mhrydain.

Daw pob tymor â rhywbeth arbennig i’w ganlyn: clychau'r gog yn y gwanwyn, dail haf toreithiog ffrwythlon, lliw hydrefol gwych, a harddwch silwetau coed y gaeaf.

Mae’r gwylfannau hanesyddol yn cynnig golygfeydd ysblennydd ar draws ceunant Afon Gwy a’r afon ei hun, drosodd i Fôr Hafren a hen Bont Hafren. Gallwch fwynhau'r golygfeydd gwych hyn trwy gydol y flwyddyn ond yn enwedig yn y gaeaf, pan fydd y dail wedi disgyn.

Mae'r golygfeydd naturiol, cwbl wefreiddiol, sydd i’w gweld yma wedi swyno ymwelwyr ers canrifoedd, ac yn eu plith arlunwyr a beirdd o Turner i Wordsworth.

Ardal o Harddwch Naturiol Eithriadol Dyffryn Gwy

Mae’r coetiroedd wedi’u lleoli yn Ardal o Harddwch Naturiol Eithriadol Dyffryn Gwy (AHNE).

Mae'r AHNE yn dirwedd warchodedig ac iddi bwysigrwydd rhyngwladol ac mae’n croesi'r ffin rhwng Cymru a Lloegr.

Mae'n cwmpasu darn 58 milltir o hyd o Afon Gwy sy'n cael ei gydnabod oherwydd y golygfeydd ysblennydd o geunant, coetiroedd dyfnant a thir amaeth a geir yma.

Dewch i ddarganfod mwy am Ardal o Harddwch Naturiol Eithriadol Dyffryn Gwy.

Cau a dargyfeirio

Sylwch:

Weithiau, rhaid inni gau neu ddargyfeirio llwybrau er eich diogelwch tra byddwn yn mynd i’r afael â gwaith cynnal a chadw neu weithrediadau coedwig
O dro i dro, efallai y bydd yn rhaid inni gau safle mewn tywydd eithafol, fel gwyntoedd cryfion neu eira a rhew, oherwydd y perygl posibl i ymwelwyr a staff
Cofiwch ddilyn unrhyw gyfarwyddiadau a welwch ar y safle, a gwnewch yn siŵr eich bod yn dilyn unrhyw arwyddion dargyfeirio dros dro sydd mewn grym

Llwybrau cerdded

Mae'r llwybrau cerdded wedi'u dynodi ac yn cychwyn o faes parcio Beacon View.

Llwybr Ban

1½ milltir, 2.4 cilomedr, hawdd

Mae'r Llwybr Ban yn daith gerdded gylchol ar lwybrau llydan, gwastad yn bennaf trwy goetiroedd ac ardaloedd agored o rostir sy'n ail-adfer. Mae gan yr wylfan fainc picnic a golygfeydd dros Fannau Brycheiniog.

Taith Grwydr Duchess Ride

3 milltir, 4.7 cilomedr, hawdd

Mwynhewch y rhostiroedd a'r coetiroedd sydd i’w gweld ar y daith gerdded gylchol hon sy’n daith wastad gan mwyaf ac yn arwain at lôn o goed Pinwydd yr Alban anferth a gwylfan Taith Grwydr Duchess Ride. Yn y fan hon ceir mainc ynghyd â golygfeydd gwych o Ddyffryn Gwy ac, ar ddiwrnod clir, gallwch weld draw tuag at y Mynyddoedd Du ym Mharc Cenedlaethol Bannau Brycheiniog.

Llwybr arall

Ym Manor Wood, ym mhentref cyfagos Narth, mae taith gerdded ddynodedig 1¾ milltir (3 cilomedr) o hyd.

Mae safle picnic ar laswellt ac ardal chwarae i blant yn y man parcio bychan wrth ymyl y ffordd yn y fan hon.

Sut i gyrraedd yma

Lleoliad

Mae Beacon View yn chwe milltir i'r de o Drefynwy.

Mae yn Sir Fynwy.

Mae'r maes parcio hwn am ddim.

Cyfarwyddiadau

O Dyndyrn, dilynwch yr arwydd am Catbrook ar y gyffordd wrth ymyl Gwesty Dyffryn Gwy. Dilynwch y ffordd hon am tua 2½ milltir. Trowch i'r chwith ar y gyffordd T gyferbyn â maes parcio Whitestone. Cymerwch y trydydd troad ar y dde, gyferbyn â Beacon Lodge, ac mae maes parcio Beacon View ar y dde ar ôl ¼ milltir. Cyfeirnod grid yr OS yw SO 510 052.

Lawrlwythwch fap o’r lleoliad.