Coedwig Clocaenog – Efail y Rhidyll, ger Rhuthun

Croeso

Mae Coetir Efail y Rhidyll ar ymyl Coedwig Clocaenog.

Mae wedi’i enwi ar ôl Ystad enfawr Efail y Rhidyll (Pool Park) gynt, a oedd ym mherchnogaeth teulu Bagot.

Yn wreiddiol roedd yr ardal yn un o bump o barciau ceirw a ddefnyddid gan berchnogion Castell Rhuthun ar gyfer hela.

Y maes parcio bach yw’r man cychwyn ar gyfer llwybr cerdded byr sydd â nodwyr arno, sy’n ddelfrydol ar gyfer torri siwrnai i ymestyn eich coesau neu i fynd am dro gyda’ch ci.

Mae sawl llwybr cyhoeddus gerllaw os oes map gennych ac os hoffech fynd ar daith gerdded hwy.

Llwybr cerdded

Mae’r llwybr â nodwyr arno ac mae’n cychwyn o’r maes parcio.

Llwybr Efail y Rhidyll

• Gradd: Hawdd
• Distance: ¾ milltir/1.2 cilomedr
• Time: 30 munud

Mae’r llwybr byr hwn yn dilyn nant ac yna’n dringo’n raddol drwy’r coetir.

Sylwch ar y coed ffynidwydd Douglas enfawr sy’n ffynnu yma a’r clystyrau o glychau’r gog yn y gwanwyn.

Cau a dargyfeirio

• Weithiau, rhaid inni gau neu ddargyfeirio llwybrau er eich diogelwch tra byddwn yn mynd i’r afael â gwaith cynnal a chadw neu weithrediadau coedwig
• O dro i dro, efallai y bydd yn rhaid inni gau safle mewn tywydd eithafol, fel gwyntoedd cryfion neu eira a rhew, oherwydd y perygl posibl i ymwelwyr a staff
• Cofiwch ddilyn unrhyw gyfarwyddiadau a welwch ar y safle, a gwnewch yn siŵr eich bod yn dilyn unrhyw arwyddion dargyfeirio dros dro sydd mewn grym

Sut i gyrraedd yma

Mae Efail y Rhidyll ddwy filltir i’r de-orllewin o Ruthun.

Mae parcio’n ddi-dâl.

Cyfarwyddiadau

Ewch ar ffordd y B5105 o Ruthun tuag at Glawddnewydd. Ar ôl 1½ filltir, mae’r maes parcio ar y dde.

Map Arolwg Ordnans

Mae Efail y Rhidyll ar fap Arolwg Ordnans (AR) 279, 293 neu 294.

Y cyfeirnod grid AR ar gyfer y maes parcio yw SJ 101 560.

Trafnidiaeth gyhoeddus

Am mwy o wybodaeth am drafnidiaeth gyhoeddus ewch i wefan Traveline Cymru.

Manylion cyswllt

0300 065 3000

ymholiadau@cyfoethnaturiolcymru.gov.uk